ACCJSU chuan, Mizoram sorkar ni sarih chhung kan ngaihchan hun chu a lo pel ta a, an ti a. "Sawrkar lam atanga engmah chhanna kan dawn loh avangin hetiang hian ACCJSU chuan natak a hma la turin thuthlukna a siam fel ta a ni," tiin an hmalak dan tur an puang.

ACCJSU chuan cess chungchangah October ni 9 leh ni 10, 2025 hian Mizoram College zawng zawnga zirlaite tumah College kal lo turin kan in ngen a. Hemi chhunga zirlaite lungawilohna- kan dil leh ngenna te engah mah sorkarin a ngailo a nih chuan October ni 14, 2025 atang hian lungawi lohna lantirin kawngzawh leh nawrh huaihawt a ni ang, an ti.

ACCJSU chuan, "Mizoram chhunga College awm zawng zawng te'n mahni District theuhah a theih ang ang a min support turin kan inngenin kan inhriattir nghal a ni," an ti bawk.

Aizawl City College Joint Students' Union (ACCJSU) chuan tuialhthei atanga cess khawn chhuah sum dawng ve thei zingah College zirna emaw, Higher & Technical Education Department lam a tel ta lo, tiin September ni 27 khan thuchhuah an lo nei tawh a.

"Human Resources Development Infrastructure’ tih hi School Education Department-ah chauh an kal tir zo ta vek a, pawi kan tiin kan rilru a na hle," tiin an lo tarlang tawh.